Skip to main content

Eneko Goiburuk irabazi du Ordiziako XLVIII. Gazta Lehiaketa

09 Iraila 2021

Berri guztiak

Irailak 8 zituen asteazken honetan jokatu da Latxa edo Karrantzako ardiaren esne gordinez artzainek egindako XLVIII. Gazta Lehiaketa, Ordizian. Bertan, Eneko Goiburu (Segura) izan da garailea, 1720eko puntuazioa lortuz.

Haren izena entzun bezain laster, eskuak altxatuta azaldu da Goiburu saria jasotzera. “Gaurkoarekin, familian hirugarren belaunaldiak lortu du garaipena Ordizian”. Bereziki hunkituta azaldu da segurarra, Adur Ezenarro alkateak txapela jartzen zion bitartean.
Bigarren saria Ordizian gelditu da, izan ere, Joseba Insaustik eskuratu du zilarrezko domina (1706 puntu), eta hirugarrena Mutrikuko Beñat Egañarentzat izan da (1688 puntu). Laugarren eta bosgarren postuak, berriz, Marta Perez Loperena (Egozkue, 1682 puntu) eta Araiako Unai Lekuona Ruiz de Luzuriagarentzat izan dira (Araia, 1666 puntu) izan dira.

Egun berezia izan da dudarik gabe, hartu diren segurtasun eta higiene neurriek eraginda. Ateak itxita egin da ekitaldia, eta gonbidapenarekin bakarrik sartu ahal izan dira bertara. Guztira 45 gazta aurkeztu dira lehiaketara, iaz baino bi gehiago. 18 izan dira ketuak eta 27 zuriak. Hala ere, eta nahiz eta kopuruz zuriak gailendu, gehiago gustatu dira ketuak: lehen bost sailkatuen gaztak kedunak izan dira.

Enkanteari dagokionez, Zaragozako El Cisne Hoteleko Javier Garciak eskuratu du gazta erdia, 9.400 euro ordaindu ondoren; iaz baino 200 gehiago.
Ezenarro alkateak gaineratu du lehen sektorearen aldeko apustu irmoa mantentzen duela Udalak eta herritarrei gonbita egin die lehen sektoreko produktuak kontsumitzeko, esaterako, adibide ederra den Ordiziako azokakoak.